“Barselona” yarim himoyachisi Pedri navbatdagi “el-klasiko” oldidan o‘z fikrlari bilan o‘rtoqlashdi. Uning so‘zlariga ko‘ra, bu safar “Real Madrid” o‘tgan mavsumdagidan ko‘ra kuchliroq qarshilik ko‘rsatadi.

“Bu safargi "el-klasiko"da ikkala jamoa ham teng darajada bosim o‘tkazuvchi futbol namoyish etadi, deb o‘ylayman. Hansi-Diter Flik qo‘l ostida biz o‘z tamoyillarimizga sodiqmiz. Doimo raqibni bosim ostiga ushlab turib, to‘pni nazorat qilishga va o‘yinning ritmini boshqarishga harakat qilamiz. Endi esa "Real"dan ham shunday o‘yin kutyapmiz, ayniqsa "Santyago Bernabeu"da ular kuchliroq o‘yin ko‘rsatadi. "Real Madrid" bu mavsum har bir uchrashuvni birinchi daqiqalardanoq yuqori bosim bilan boshlashyapti. Bizni qiyin o‘yin kutmoqda”, dedi Pedri Madrid Universal nashriga bergan intervyusida.

Eslatib o‘tamiz, “Barselona” o‘tgan mavsumda “el-klasiko”ning barcha to‘rtta uchrashuvida g‘alaba qozongan edi. Mazkur uchrashuvlarda kataloniyaliklar umumiy 16:7 hisobda raqibidan ustun kelgan. Navbatdagi “el-klasiko” 26 oktyabr, yakshanba kuni Madriddagi “Santiyago Bernabeu” stadionida bo‘lib o‘tadi. Bellashuv O‘zbekiston vaqti bilan 20:15 da boshlanadi.

Ma’lumot uchun, hozirda “qirollik klubi” 24 ochko bilan turnir jadvalida 1-o‘rinda, 22 ochkoga ega “Barselona” esa 2-pog‘onada bormoqda.