Saudiya Arabistoni Qiroli kubogi 1/8 final bosqichidan o‘rin olgan “An-Nasr” va “Al-Ittihod” jamoalari o‘rtasidagi uchrashuv yakunlandi. Bellashuv Ar-Riyoddagi “Mrsul Park” stadionida bo‘lib o‘tdi. O‘yin 2:1 hisobida mehmonlar foydasiga yakunlandi.

Uchrashuvda hisobni 15-daqiqada “Real”ning sobiq hujumchisi Karim Benzema ochdi. 30-daqiqada “An-Nasr” forvardi Gabriel Anjelo hisobni tenglashtirdi. Birinchi bo‘limning qo‘shimcha daqiqalarida (45+2) “Al-Ittihod” yarimhimoyachisi Ussem Auar jamoasiga g‘alaba golini kiritdi.

49-daqiqada “Al-Ittihod” himoyachisi Axmed Al-Julaydan qizil kartochka olib, maydondan chetlatildi. Qolgan daqiqalarda "An-Nasr" bir kishi ko‘p bo‘lib o‘ynasa-da, raqib darvozasiga yo‘l topa olmadi.

Krishtianu Ronaldu mazkur o‘yinda to‘liq harakat qildi va eng past olgan futbolchilardan biri bo‘ldi (6,3 ball).

Avvalgi bosqichda “An-Nasr” “Jidda”ni 4:0 hisobida mag‘lub etgan bo‘lsa, “Al-Ittihod” “Al-Vahda”ni musobaqadan chiqarib yuborgan edi (1:0).

Qirol Kubogi — 1/8 final
28 oktyabr 2025 yil, seshanba.
An-Nasr (Ar-Riyod) — Al-Ittihod (Jidda) - 1:2
Gollar: 0:1 — Benzema (15'), 1:1 — Anjelo (30'), 1:2 — Auar (45+2')
Chetlatish: Al-Julaydan (49', “Al-Ittihod”)