"Katta dubulg‘a" turkumiga kiruvchi turnirlarning to‘rt karra g‘olibi, italiyalik tennischi Yannik Sinner Parijdagi (Fransiya) "Masters" turkumiga kiruvchi turnir yakunlari bo‘yicha bir haftaga jahon reytingida birinchi o‘ringa qaytishi mumkin.
Buning uchun Sinner Parijdagi "Masters"da g‘alaba qozonishi, jahon reytingining amaldagi yetakchisi, olti karra yirik chempion ispaniyalik Karlos Alkaras esa yarim finaldan oldin mag‘lub bo‘lishi kerak. O‘shanda Yannik Sinner atigi bir haftaga dunyoning birinchi raketkasi unvonini qaytarib olishi mumkin bo‘ladi.
Reyting 9-16 noyabr kunlari bo‘lib o‘tadigan ATP yakuniy chempionati - 2025 starti oldidan yangilanadi. Eslatib o‘tamiz, Parijdagi turnir Yannik Sinner faoliyatidagi eng yomon "Masters" hisoblanadi.
