"Kristal Pelas" Angliya liga kubogi doirasida "Enfild"da 3:0 hisobida g‘alaba qozonib, "Liverpul"ning mag‘lubiyatlar seriyasini uzaytirdi.

"Qizillar" uchun bu mag‘lubiyat barcha musobaqalardagi so‘nggi yettita bahsning oltinchisi bo‘ldi. Qayd etish joiz, Arne Slot "burgutlar"ga qarshi o‘yinda asosiy tarkibni tanlamadi.

"Bunday tarkibni tanlash menga to‘g‘ri qaror bo‘lib tuyuldi. Har bir o‘yinda asosiy tarkib futbolchilaridan foydalanishda davom etsak, jarohatlar bilan bog‘liq vaziyatni yanada og‘irlashtirishimiz mumkin. Klubimizni kuzatib borayotgan odamlar bu turnirda yoshlarni o‘ynatayotganimizni juda yaxshi bilishadi.

"Liverpul"da ishlab, natijaga erisha olmaganingda doim bosim seziladi. Bugungi mag‘lubiyat nimanidir o‘zgartirdi deb o‘ylamayman. Muvaffaqiyatsiz seriyamizning ko‘plab sabablari bor, ammo ularning hech biri bizni oqlamaydi", - dedi Slot o‘yindan keyingi intervyusida.

Shanba kuni "Liverpul" APL doirasida "Aston Villa"ga qarshi maydonga tushadi.