«Manchester Yunayted»ning markaziy hujumchisi Joshua Zirkzee qishki transfer oynasida jamoani tark etmoqchi, deb xabar berdi Sky Sports.

Manba ma’lumotlariga ko‘ra, niderlandiyalik forvard berilayotgan o‘yin vaqtidan norozi — u joriy mavsumda hammasi bo‘lib atigi 90 daqiqa maydonda bo‘lgan. Shu sababli Zirkzee o‘z agentiga unga ijaraga ketish imkoni bor jamoani topishni so‘ragan.

Ma’lumotlarga ko‘ra, futbolchiga Italiyadan qiziqish bor — «Roma» allaqachon «qizil iblislar» bilan muzokaralarni boshlagan.

Eslatib o‘tamiz, Zirkzee 2024 yil yozida «Manchester Yunayted» safiga qo‘shilgan. U shu vaqt mobaynida klub safida 54 ta o‘yin o‘tkazib, 7 ta gol va 3 ta golli uzatma qayd etgan.