Jahon shaxmat federasiyasi (FIDE) oktyabr oyi yakuni bo‘yicha yangilangan reytingni e’lon qildi. Kuchli 100 talik ro‘yxatda O‘zbekistondan 5 nafar grossmeyster o‘rin oldi.

Reytingda norvegiyalik Magnus Karlsen 2839 ochko bilan yetakchilikni saqlab qoldi. Uning natijasi o‘zgarmagan bo‘lsa-da, birinchi o‘rinni boy bermadi. Ikkinchi pog‘onadan amerikalik Hikaru Nakamura joy oldi (2813). Kuchli uchlikni esa yana bir AQSH vakili Fabiano Karuana (2795) yakunladi. O‘tgan oyga nisbatan Nakamuraning ochkolari 3 ballga kamaygan bo‘lsa, Karuana o‘z hisobiga 6 ball qo‘shib qo‘ygan. Lekin o‘tgan oyga nisbatan kuchli uchlikda hech qanday o‘zgarish kuzatilmadi.

O‘zbekistonlik shaxmatchilar qanday o‘rinlarni egallagan?

Nodirbek Abdusattorov hamon O‘zbekistonning birinchi raqamli shaxmatchisi bo‘lib turibdi. Hozirda uning hisobida 2750 ochko bor. Abdusattorov hozirda FIDE reytingida 12-pog‘onani egallab turibdi. O‘tgan oyga taqqoslasak, Nodirbekning ochkolari ham, reytingdagi o‘rni ham o‘zgarishsiz qoldi.

O‘zbekistonlik eng kuchli ikkinchi grossmeyster Javohir Sindorov FIDE reytingida 1 pog‘ona pastlab, 25-o‘rindan joy oldi. Uning ochkolari o‘zgarishsiz qoldi (2721), ammo xitoylik raqibi Yu Yangyi oktyabr oyida o‘z hisobida 6 ball qo‘shib oldi. Natijada, Sindorovni ortda qoldirib, 24-pog‘onaga ko‘tarilib oldi.

Nodirbek Yakubboyev reytingda ko‘tarilishda davom etmoqda. U sentyabr oyi yakunlariga ko‘ra, 5 pog‘ona yuqorilab, 40-pog‘onani egallab turgan edi. Oktyabr oyida Yakubboyev yana 3 pog‘ona ko‘tarildi (37-o‘rin). Hozirda uning hisobida 2689 ochko bor. Tajribali grossmeyster Rustam Qosimjonov 2671 ochko bilan 46-o‘rinni egallab turibdi. U o‘tgan oyda 47-o‘rinda edi. Yana bir o‘zbekistonlik shaxmatchi Shamsiddin Vohidov 2640 ochko bilan 86-o‘rinni band etgan.

FIDE jamoaviy reytingiga ko‘ra, O‘zbekiston Shaxmat federasiyasi 2607 ochko bilan 12-o‘rinni egallab turibdi.