Madridning “Real” klubi hujumchisi Vinisius Junior faoliyatini Angliya Premyer Ligasida davom ettirishi mumkin. Fichajes nashrining xabar berishicha, futbolchiga “Manchester Siti” jiddiy qiziqish bildirmoqda.

Manbaga ko‘ra, “shaharliklar” ustozi Pep Gvardiola klub rahbariyatidan Vinisiusning transferini so‘ragan. Ispaniyalik mutaxassisning fikricha, braziliyalik forvard hamda Erling Holand juftligi “Manchester Siti” hujum chizig‘ini kuchaytirishi mumkin. Hozirda ingliz klubi rahbariyati Vinisius uchun 150 million yevrolik taklif tayyorlamoqda. Agar tomonlar kelishuvga erisha olsa, mazkur transfer yozda amalga oshishi mumkin.

Vinisiusning kelajagi hamon noaniqligicha qolmoqda. Chunki klub rahbariyati hamda futbolchi yangi shartnoma bo‘yicha kelishuvga erisha olmayapti. Sababi hujumchi klubning eng ko‘p maosh oladigan futbolchilaridan biriga aylanishni maqsad qilgan. “Real Madrid” rahbariyati esa uning talablarini qanoatlantirmoqchi emas. Mazkur holat ortidan tomonlar o‘rtasidagi muzokaralar to‘xtab qolgan.

Avvalroq “qirollik klubi” prezidenti Florentino Peres futbolchini sotishga qaror qilgani haqida xabarlar tarqalgandi. Unga ko‘ra, Peres futbolchining maydondagi va undan tashqaridagi xatti-harakatlaridan bezor bo‘lgan va “hech bir o‘yinchi klubdan muhim emas” degan prinsipni boshqalarga ko‘rsatib qo‘ymoqchi.

25 yoshli Vinisius 2018-yildan beri “Real Madrid” sharafini himoya qiladi. U klub bilan uch karra Ispaniya chempioni, ikki karra Chempionlar Ligasi g‘olibi bo‘lgan. Braziliyalik futbolchi “Real” safida 335 o‘yinda maydonga tushib, 111 ta gol va 87 ta golli uzatma amalga oshirgan. U Braziliya terma jamoasi safida ham 43 o‘yin o‘tkazib, 8 ta gol va 7 ta assist qayd etgan.

Uning klub bilan shartnomasi 2027-yilning yoziga qadar amal qiladi. Transfermarkt portali futbolchining qiymatini 150 million yevroga baholagan.