Qatarda davom etayotgan 17 yoshli futbolilar o‘rtasida jahon chempionatining 3-turi doirasida O‘zbekiston U17 terma jamoasi Panamaga qarshi maydonga chiqib, yirik hisobda g‘alaba qozondi.

Panamaliklarda ham pley-offga chiqish uchun imkoniyat saqlab qolayotgani uchun jamoa birinchi bo‘limda ancha faol o‘yin namoyish etdi. Hattoki, ular 15-daqiqada penalti tepish huquqini qo‘lga kiritishdi. Futbolchining zarbasini darvozabonimiz Ibrohim Shokirov qaytarishga muvaffaq bo‘ldi.

Tanaffusgacha jamoamizning hujumdagi ishlari u qadar yaxshi yurishmadi.

Bosh murabbiy tanaffusda shogirdlari bilan yaxshilab gaplashib oldi shekilli, o‘yinchilar ikkinchi bo‘limni o‘zgacha kayfiyatda boshlashdi. Bahsning 48-daqiqasida Abubakr Shukurullayev hisobni ochgan bo‘lsa, oradan 5 daqiqa o‘tib Sadriddin Hasanov farqni ikkitaga yetkazdi.

Ushbu gollar tufayli Panama o‘yinni tashlab yubordi. Futbolchilarimiz esa gollardan ilhomlanib, ketma-ket gollar urishdi va hisobni 6:0 ko‘rinishga keltirishdi. Panama esa 90+10-daqiqada bitta javob to‘pini kiritdi.

Ushbu g‘alaba tufayli O‘zbekiston o‘z ochkolari 6 taga yetkazib, "J" guruhida 2-o‘rinni egalladi. Irlandiya esa bugun Paragvay bilan durang o‘ynab, 7 ochko bilan guruh peshqadami bo‘ldi.

O‘zbekistonning 1/16 finaldagi raqibi birozdan keyin aniq bo‘ladi.

O‘ZBEKISTON U17 - PANAMA U17 - 6:1
Gollar: Abubakr Shukurullayev (48), Sadriddin Hasanov (53), Sayfiddin Sodiqov (68), Jamshidbek Rustamov (90+1), Asilbek Aliyev (90+4), Abdusamad Saidov (90+7-penalti) — Pacheko (90+10)