Қатарда давом этаётган 17 ёшли футболилар ўртасида жаҳон чемпионатининг 3-тури доирасида Ўзбекистон U17 терма жамоаси Панамага қарши майдонга чиқиб, йирик ҳисобда ғалаба қозонди.

Панамаликларда ҳам плей-оффга чиқиш учун имконият сақлаб қолаётгани учун жамоа биринчи бўлимда анча фаол ўйин намойиш этди. Ҳаттоки, улар 15-дақиқада пенальти тепиш ҳуқуқини қўлга киритишди. Футболчининг зарбасини дарвозабонимиз Иброҳим Шокиров қайтаришга муваффақ бўлди.

Танаффусгача жамоамизнинг ҳужумдаги ишлари у қадар яхши юришмади.

Бош мураббий танаффусда шогирдлари билан яхшилаб гаплашиб олди шекилли, ўйинчилар иккинчи бўлимни ўзгача кайфиятда бошлашди. Баҳснинг 48-дақиқасида Абубакр Шукуруллаев ҳисобни очган бўлса, орадан 5 дақиқа ўтиб Садриддин Ҳасанов фарқни иккитага етказди.

Ушбу голлар туфайли Панама ўйинни ташлаб юборди. Футболчиларимиз эса голлардан илҳомланиб, кетма-кет голлар уришди ва ҳисобни 6:0 кўринишга келтиришди. Панама эса 90+10-дақиқада битта жавоб тўпини киритди.

Ушбу ғалаба туфайли Ўзбекистон ўз очколари 6 тага етказиб, "J" гуруҳида 2-ўринни эгаллади. Ирландия эса бугун Парагвай билан дуранг ўйнаб, 7 очко билан гуруҳ пешқадами бўлди.

Ўзбекистоннинг 1/16 финалдаги рақиби бироздан кейин аниқ бўлади.

ЎЗБЕКИСТОН U17 - ПАНАМА U17 - 6:1
Голлар: Абубакр Шукуруллаев (48), Садриддин Ҳасанов (53), Сайфиддин Содиқов (68), Жамшидбек Рустамов (90+1), Асилбек Алиев (90+4), Абдусамад Саидов (90+7-пенальти) — Пачеко (90+10)