“Barselona” va Niderlandiya terma jamoasi yarim himoyachisi Frenki de Yong kataloniyaliklar safidagi eng yorqin davri haqida fikr bildirdi hamda kelajak borasidagi maqsadlarini baham ko‘rdi.

“Men uchun bu yerdagi eng yaxshi davr, ehtimol, o‘tgan mavsum edi — biz La Liga, Ispaniya Kubogi va Superkubokni yutdik,” — dedi de Yong Mundo Deportivo nashriga bergan intervyusida.

Futbolchi shunday deb davom etdi:

“O‘tgan yil boshida to‘piq jarohatini olganman va avvalambor tiklanish haqida o‘yladim. Formang pasaygan paytda shartnomani uzaytirish to‘g‘ri emas, buni yaxshi o‘ynayotganingda qilish kerak. Ammo mening niyatim har doim qolish bo‘lgan.
“Barselona” bilan ilk shartnomani imzolaganimda, bu yerda 10–12 yil o‘ynashni orzu qilgandim. Endi bu real imkoniyatga o‘xshaydi. Agar sen “Barselona”da olti yoki o‘n yil o‘ynasang, kamida bir marta Chempionlar ligasini yutishing kerak. Demak, menda hali shu maqsad bor.”

Eslatib o‘tamiz, de Yong 2019 yil yozida “Ayaks”dan ko‘k-anorranglilar safiga qo‘shilgan va shu vaqtdan beri jamoa yarim himoyasining eng muhim figuralaridan biriga aylandi.