“Барселона” ва Нидерландия терма жамоаси ярим ҳимоячиси Френки де Йонг каталонияликлар сафидаги энг ёрқин даври ҳақида фикр билдирди ҳамда келажак борасидаги мақсадларини баҳам кўрди.

“Мен учун бу ердаги энг яхши давр, эҳтимол, ўтган мавсум эди — биз Ла Лига, Испания Кубоги ва Суперкубокни ютдик,” — деди де Йонг Mundo Deportivo нашрига берган интервьюсида.

Футболчи шундай деб давом этди:

“Ўтган йил бошида тўпиқ жароҳатини олганман ва авваламбор тикланиш ҳақида ўйладим. Форманг пасайган пайтда шартномани узайтириш тўғри эмас, буни яхши ўйнаётганингда қилиш керак. Аммо менинг ниятим ҳар доим қолиш бўлган.
“Барселона” билан илк шартномани имзолаганимда, бу ерда 10–12 йил ўйнашни орзу қилгандим. Энди бу реал имкониятга ўхшайди. Агар сен “Барселона”да олти ёки ўн йил ўйнасанг, камида бир марта Чемпионлар лигасини ютишинг керак. Демак, менда ҳали шу мақсад бор.”

Эслатиб ўтамиз, де Йонг 2019 йил ёзида “Аякс”дан кўк-анорранглилар сафига қўшилган ва шу вақтдан бери жамоа ярим ҳимоясининг энг муҳим фигураларидан бирига айланди.