Milanning "Inter" klubi hujumchisi Anj-Yoan Bonni jamoadoshlari Lautaro Martines va Markus Tyuram haqida gapirdi.
22 yoshli futbolchi klubda ko‘pincha argentinalik va fransiyalik futbolchi o‘rinbosarlari rolini o‘ynaydi. U A Seriyaning 11 o‘yinida 4+4 ko‘rsatkichini qayd etdi.
"Men Lautaroning gol urishga bo‘lgan ishtiyoqini o‘zlashtirishni istardim. Bu yoshda "Inter" tarixidagi to‘rtinchi to‘purar bo‘lish - aql bovar qilmas yutuq. U har doim gol urishni xohlaydi.
Markusga kelsak, u hamma narsani biladi: gol uradi, aldab o‘tadi, pas beradi. Ehtimol, u bilan ko‘proq o‘xshashliklarim bordir, lekin biz baribir har xilmiz va birga o‘ynashimiz mumkin.
Shuningdek, men Pio Espositoning to‘pni yaxshi ushlab turish qobiliyatini o‘zlashtirishni istardim - bu borada u kabi yaxshi bo‘lganlar kam," - deydi Bonni La Gazzetta dello Sport nashriga bergan intervyusida.
