O‘zbekiston terma jamoasi hamda Eronning “Persepolis” klubi futbolchisi Oston O‘runov so‘nggi 24 soat ichida Transfermarkt portalida eng ko‘p qidirilgan futbolchiga aylandi. Bu haqda “Tarafdari.com” nashri xabar berdi.

Fabio Kannavaro boshchiligidagi jamoa 14 noyabr, juma kuni Misrga qarshi o‘yinda 2:0 hisobida g‘alaba qozondi. Ushbu bahsda O‘runov yorqin o‘yin ko‘rsatdi. Uchrashuvdagi har ikki golga ham aynan Oston mualliflik qildi. Qolaversa, 24 yoshli vinger o‘yin davomida 4 ta aniq zarba berdi (2 ta gol). Shuningdek, 1 marta darvoza to‘sinini poyladi, 18 ta muvaffaqiyatli dribling qildi va bitta kalit pas berdi.

“Liverpul” hujumchisi Muhammad Saloh o‘ynagani ortidan uchrashuvga bo‘lgan qiziqish juda yuqori edi. Manbaga ko‘ra, bellashuvni tomosha qilgan muxlislar O‘runovning ko‘rsatgan o‘yinidan hayratda qolgan. 24 yoshli futbolchi o‘sha kuni Erling Holand, Lionel Messi, Krishtianu Ronaldo va Kilian Mbappe kabi yulduzlarni ortda qoldirib, Transfermarkt portalida eng ko‘p qidirilgan futbolchi bo‘ldi.

Ma’lumot uchun, O‘runov 2019-yildan beri O‘zbekiston terma jamoasi sharafini himoya qilib keladi. U hozirga qadar “oq bo‘rilar” safida 38 ta uchrashuvda maydonga tushib, 10 ta gol hamda bir golli uzatma muallifiga aylangan. Futbolchi 2024-yildan beri Eronning “Persepolis” klubi sharafini himoya qiladi. Joriy mavsum tehronliklar safida 9 ta uchrashuvda ishtirok etib, o‘z hisobiga bitta assist yozdirib qo‘ygan. Transfermarkt portali vingerning qiymatini 2 million yevroga baholagan.