Ўзбекистон терма жамоаси ҳамда Эроннинг “Персеполис” клуби футболчиси Остон Ўрунов сўнгги 24 соат ичида Transfermarkt порталида энг кўп қидирилган футболчига айланди. Бу ҳақда “Tarafdari.com” нашри хабар берди.

Фабио Каннаваро бошчилигидаги жамоа 14 ноябрь, жума куни Мисрга қарши ўйинда 2:0 ҳисобида ғалаба қозонди. Ушбу баҳсда Ўрунов ёрқин ўйин кўрсатди. Учрашувдаги ҳар икки голга ҳам айнан Остон муаллифлик қилди. Қолаверса, 24 ёшли вингер ўйин давомида 4 та аниқ зарба берди (2 та гол). Шунингдек, 1 марта дарвоза тўсинини пойлади, 18 та муваффақиятли дриблинг қилди ва битта калит пас берди.

“Ливерпуль” ҳужумчиси Муҳаммад Салоҳ ўйнагани ортидан учрашувга бўлган қизиқиш жуда юқори эди. Манбага кўра, беллашувни томоша қилган мухлислар Ўруновнинг кўрсатган ўйинидан ҳайратда қолган. 24 ёшли футболчи ўша куни Эрлинг Ҳоланд, Лионель Месси, Криштиану Роналдо ва Килиан Мбаппе каби юлдузларни ортда қолдириб, Transfermarkt порталида энг кўп қидирилган футболчи бўлди.

Маълумот учун, Ўрунов 2019-йилдан бери Ўзбекистон терма жамоаси шарафини ҳимоя қилиб келади. У ҳозирга қадар “оқ бўрилар” сафида 38 та учрашувда майдонга тушиб, 10 та гол ҳамда бир голли узатма муаллифига айланган. Футболчи 2024-йилдан бери Эроннинг “Персеполис” клуби шарафини ҳимоя қилади. Жорий мавсум теҳронликлар сафида 9 та учрашувда иштирок этиб, ўз ҳисобига битта ассист ёздириб қўйган. Transfermarkt портали вингернинг қийматини 2 миллион еврога баҳолаган.