Professional tennischilar assosiasiyasi (ATP) haftalik yangi reytingni e’lon qildi. Yangilangan ro‘yxatga kirgan 8 nafar o‘zbekistonlik tennischidan faqat ikki nafari o‘z o‘rnini yaxshilay oldi. Eng e’tiborga molik tomoni shundaki, Sergey Fomin uch yillik tanaffusdan so‘ng yana mamlakatning birinchi raketkasi maqomini qaytarib oldi.

Bahrayndagi M25 toifasidagi turnirda g‘olib bo‘lgan Fomin reytingda birdaniga 47 pog‘ona yuqoriladi va umumiy hisobda 23 ochko qo‘shib oldi. Natijada u ATP reytingida 358-o‘ringa ko‘tarilib, Humoyun Sultonovni ortda qoldirdi.

16 ochko yo‘qotgan Humoyun Sultonov esa 46 pog‘ona pasayib, 442-o‘ringacha tushib ketdi va endi O‘zbekistonning ikkinchi raketkasi sanaladi.

O‘zbekistonning uchinchi raqamli raketkasi Maksim Shin 11 pog‘ona yuqorilab, 966-o‘rindan joy oldi. Qolgan tennischilar esa yangilangan reytingda pastlagan: Amir Milushev — 7 pog‘ona, Batir Sapaev, Ilya Ignatov, Abdulaziz Usmonjonov va Damir Abdusalomov esa bir xil — 10 pog‘onadan pastga tushgan.

Jahonning birinchi raqamli raketkasi ispaniyalik Karlos Alkaser bo‘lib turibdi. Ikkinchi pog‘onadan italiyalik Yannik Sinner joy olgan bo‘lsa, kuchli uchlikni Aleksandr Zverov yakunlagan. Qozog‘istonlik tennischi Aleksandr Bublik esa Jahon reytingida 11-po‘g‘onani egallab turibdi.