Superliga pley-off bosqichidan o‘rin olgan "Mash’al" – "Buxoro" uchrashuvi 0:0 hisobida yakun topdi va penaltilar seriyasida muborakliklarning qo‘li baland keldi (3:1).
O‘yindan so‘ng "Buxoro" bosh murabbiyi Aleksandr Xomyakov matbuot anjumanida ishtirok etdi.
- O‘yin haqida fikringiz...
- Anchadan beri ko‘rishmagandik. Hammani ko‘rib turganimdan xursandman. O‘yinga keladigan bo‘lsak, har ikki jamoa asabiy bahsni o‘tkazdi. Jamoalar xato qilmaslik uchun juda ehtiyotkor bo‘lib o‘ynashdi. Odatda pley-off uchrashuvlari shunaqa kechadi. Vaziyatlarga boy o‘yin ko‘rmadik, bitta gol o‘yin taqdirini hal qilib qo‘yishi mumkin edi. Afsuski, penaltilar seriyasida mag‘lub bo‘ldik. "Mash’al"ni vazifani bajarib, Superligada qolgani bilan tabriklayman. Biz esa kurashishda davom etamiz.
— Jamoangiz gol urdi, lekin hisobga olinmadi...
- O‘sha golni men ko‘rmay qoldim. Ofsayd tufayli gol inobatga olinmaganini bildim. Hakamlar shunday qaror qabul qilishdi.
