"Barselona" yarim himoyachisi Pedri Frankfurtning "Ayntraxt" klubiga (2:1) qarshi o‘yindagi kambek haqida gapirdi.
Xans-Diter Flik jamoasi birinchi bo‘limda mag‘lub bo‘ldi, ammo tanaffusdan ko‘p o‘tmay Jyul Kundening dubli evaziga g‘alabani ilib ketdi.
"Biz uch ochkoni qo‘lga kiritdik, ammo o‘yin og‘ir kechdi. Birinchi bo‘limda "Ayntraxt" juda ixcham harakat qildi. Tanaffusda tuzatishlar kiritishga to‘g‘ri keldi, ular ish berdi. Raqib oxirgi chiziqda olti o‘yinchi bilan himoyalandi, bu bizni hayratda qoldirdi. Bunday himoyaga qarshi turish qiyin, lekin biz yechim topishga muvaffaq bo‘ldik. Kunde uchun juda xursandman - u ko‘p ishladi, bu gollar uning foydasiga ishlaydi," - deya Pedrining so‘zlarini keltiradi Barca Universal.
Umumiy bosqichning navbatdagi turida "Barselona" Praganing "Slaviya" klubiga qarshi bahs olib boradi.
