Tether Holdings kompaniyasining sho‘ba korxonasi bo‘lgan Tether Investments kompaniyasi "Yuventus" futbol klubining 65 foizdan ortiq ulushini sotib olish niyatida ekanligini ma’lum qildi. Hozirda Tether aksiyalarning taxminan 11,5 foiziga egalik qilmoqda. Bu haqda Corriere dello Sport nashri xabar bermoqda.
Agar kelishuv amalga oshsa, klubda xo‘jayin o‘zgaradi. Ilgari jamoa ko‘p yillar davomida Anyellilar oilasiga tegishli bo‘lgan. Tether’ning ta’kidlashicha, agar kelishuv muvaffaqiyatli bo‘lsa, ular "birinchi jamoani mustahkamlash va klubning rivojlanishi va o‘sishini qo‘llab-quvvatlash uchun" 1 milliard yevro sarmoya kiritishga tayyor.
Shu bilan birga, Anyellining oilasi hozircha bunday imkoniyatni rad etmoqda. Ularning so‘zlariga ko‘ra, hozirda "Yuventus"dagi ulushni sotish bo‘yicha hech qanday muzokaralar olib borilmayapti.
