"Manchester Yunayted" yarim himoyachisi Kobbi Maynu "Napoli"ning ustuvor transfer maqsadlari qatorida qolmoqda.
20 yoshli futbolchi Ruben Amorim jamoasidagi holatidan norozi - portugaliyalik mutaxassis unga kamdan-kam hollarda asosiy tarkibdagi joyni ishonib topshiradi. Umidli xavbek jahon chempionati oldidan o‘yin amaliyotiga ega bo‘lish uchun mavsum oxirigacha ijaraga ketmoqchi. Insayder Nikolo Skiraning ma’lumotiga ko‘ra, "Napoli" angliyalik futbolchini ijaraga olish bo‘yicha faol ish olib bormoqda. Yaqin kunlarda klub vakillarining futbolchining agenti bilan to‘g‘ridan-to‘g‘ri muzokaralari bo‘lib o‘tishi kutilmoqda.
Kobbi Maynu joriy mavsum 11 ta o‘yinda maydonga tushdi. "Qizil iblislar" o‘z tarbiyalanuvchisi bilan xayrlashishga tayyormi yoki yo‘qmi, hozircha noma’lum.
