"Barselona" markaziy himoyachisi Pau Kubarsi klub safida 100 ta o‘yin o‘tkazgan ikkinchi eng yosh futbolchiga aylandi. Uning yubileyi Ispaniya kubogi 1/32 finalidan o‘rin olgan "Gvadalaxara"ga qarshi o‘yinga (2:0) to‘g‘ri keldi.

Kubarsi o‘zining 100-uchrashuvini atigi 18 yoshu 329 kunligida o‘tkazdi. Undan oldin bunday ko‘rsatkichga faqat hujumchi Lamin Yamal erishgan, u 17 yoshu 293 kunligida o‘zining 100-uchrashuvida maydonga tushgan. Kechagi "Gvadalaxara"ga qarshi o‘yin uning uchun "Barselona"dagi 125-o‘yin bo‘ldi.

Hozirda kataloniyaliklar safida o‘z klubi safida 100 ta o‘yinda maydonga tushgan eng yosh besh futbolchidan to‘rt nafari - Lamin Yamal va Pau Kubarsi, shuningdek, Gavi (19 yosh-u 84 kun) va Pedri (20 yosh-u 66 kun) o‘ynamoqda.