Yoshlar futbolini rivojlantirishga qaratilgan FIFA’ning qat’iy sa’y-harakatlari doirasida, FIFA Kengashi o‘g‘il bolalar va qizlar o‘rtasida o‘tkaziladigan, barcha 211 ta FIFA a’zo assosiasiyalari uchun ochiq bo‘ladigan yangi FIFA U-15 festival uslubidagi turnirlar joriy etilishini tasdiqladi.

Ilk musobaqa 2026 yilda o‘g‘il bolalar jamoalari ishtirokida o‘tkaziladi. Ikkinchi turnir esa 2027 yilda qizlar jamoalari o‘rtasida tashkil etiladi.

Ushbu tashabbus izchil davom ettirilib, 2028 yildan boshlab barcha a’zo assosiasiyalar ikki alohida musobaqada — o‘g‘il bolalar va qizlar U-15 jamoalari bilan ishtirok etishga taklif etiladi. U-15 yosh toifasidagi futbolchilarning rivojlanish ehtiyojlariga mos ravishda o‘yinlar qisqaroq davom etadi, kichikroq maydonlarda o‘tkaziladi hamda jamoalar tarkibi har tomondan 7 nafardan 9 nafargacha o‘yinchidan iborat bo‘ladi.

«So‘nggi yillarda FIFA yoshlar futbolini rivojlantirish bo‘yicha sa’y-harakatlarini sezilarli darajada kuchaytirdi va buning natijalari yaqqol ko‘rinib turibdi. Biz yoshlar musobaqalari va rivojlanishini faol targ‘ib qildik, bu esa tabiiy va juda quvonchli navbatdagi qadamdir», — dedi FIFA prezidenti Janni Infantino.

«O‘g‘il bolalar va qizlar uchun FIFA U-15 festivallarining o‘tkazilishi FIFA’ning dunyo bo‘ylab har bir iqtidorga imkoniyat berish yo‘lidagi intilishlarida hal qiluvchi ahamiyatga ega bo‘ladi hamda FIFA futbolga qayta investisiya kiritayotganining yana bir yorqin namunasidir».