Futbol bo‘yicha 2030 yilgi jahon chempionati finali "Real"ning uy stadioni "Santyago Bernabeu"da bo‘lib o‘tishi mumkin. Bu haqda AS nashri xabar bermoqda.
Manbaga ko‘ra, o‘yinni Madriddagi stadionda o‘tkazish qaroriga "Real" prezidenti Florentino Peres va FIFA prezidenti Janni Infantino o‘rtasidagi mustahkam munosabatlar sabab bo‘lishi mumkin. Qayd etilishicha, tashkilotchi shaharlarning yakuniy ro‘yxati 2026 yilning so‘nggi oylarida e’lon qilinadi. FIFA Ispaniya, Marokash va Portugaliya terma jamoalari mezbonlik qiladigan jahon chempionatining yakuniy formati bo‘yicha qarorni yoz oxirigacha qabul qilmaydi.
Aniqlik kiritilishicha, FIFA Ispaniyaning u taqdim etadigan arenalar sonini, jahon futbolidagi o‘rnini hisobga oladi.
Bundan tashqari, ro‘yxatda "Metropolitano" - Madridning "Atletiko" klubi uy stadioni, shuningdek, "Kamp Nou" ham bor, ammo "Barselona" stadioni rekonstruksiyasi atrofida hamon mavhumlik hukm surmoqda. O‘z navbatida, "Benfika" stadioni jiddiy da’vogar sifatida ko‘rilmayapti.
