Футбол бўйича 2030 йилги жаҳон чемпионати финали "Реал"нинг уй стадиони "Сантьяго Бернабеу"да бўлиб ўтиши мумкин. Бу ҳақда AS нашри хабар бермоқда.
Манбага кўра, ўйинни Мадриддаги стадионда ўтказиш қарорига "Реал" президенти Флорентино Перес ва ФИФА президенти Жанни Инфантино ўртасидаги мустаҳкам муносабатлар сабаб бўлиши мумкин. Қайд этилишича, ташкилотчи шаҳарларнинг якуний рўйхати 2026 йилнинг сўнгги ойларида эълон қилинади. ФИФА Испания, Марокаш ва Португалия терма жамоалари мезбонлик қиладиган жаҳон чемпионатининг якуний формати бўйича қарорни ёз охиригача қабул қилмайди.
Аниқлик киритилишича, ФИФА Испаниянинг у тақдим этадиган ареналар сонини, жаҳон футболидаги ўрнини ҳисобга олади.
Бундан ташқари, рўйхатда "Метрополитано" - Мадриднинг "Атлетико" клуби уй стадиони, шунингдек, "Камп Ноу" ҳам бор, аммо "Барселона" стадиони реконструкцияси атрофида ҳамон мавҳумлик ҳукм сурмоқда. Ўз навбатида, "Бенфика" стадиони жиддий даъвогар сифатида кўрилмаяпти.
