"Milan" "Vest Xem" hujumchisi Niklas Fyullkrug transferi bo‘yicha kelishuvga erishishga yaqin turibdi. Bu haqda jurnalist Fabrisio Romano xabar bermoqda.
Manbaga ko‘ra, yakuniy tafsilotlar hali kelishilmagan, klublar kelishuvga erishish uchun muzokaralar olib bormoqda. Bir necha kun oldin Fyullkrug "Milan"ga o‘tishga rozilik bergandi. Transfer sotib olish huquqi bilan ijara formatida rejalashtirilgan, bunda opsiya majburiy bo‘lmaydi. Mumkin bo‘lgan sotib olish miqdori 14-15 million yevrodan kam.
Joriy mavsumda germaniyalik hujumchi barcha musobaqalarda to‘qqizta o‘yinda maydonga tushdi va ularda gol ura olmadi. Umumiy hisobda Fyullkrug 413 daqiqa harakat qildi. Futbolchining "Vest Xem" bilan amaldagi mehnat shartnomasi 2028 yilning yoziga qadar mo‘ljallangan. Transfermarkt portalida keltirilgan ma’lumotlarga ko‘ra, futbolchining bozor narxi 8 mln yevroni tashkil etadi.
