"Nyukasl" bosh murabbiyi Eddi Xau "Chelsi" bilan o‘yindagi durang (2:2) haqida fikr bildirdi. Birinchi bo‘limdan keyin "qarg‘alar" 2:0 hisobida oldinda edi.

"Qiyin, chunki bugun juda yaxshi o‘ynagandik. Ajoyib o‘yin, ayniqsa birinchi bo‘limda. G‘alabaga erisha olmaganimiz yigitlar uchun juda achinarli.

Birinchi bo‘lim qanchalik yaxshi bo‘lishimiz mumkinligini eslatib qo‘ydi. Jismoniy jihatdan biz yaxshiroqda edik, pressing a’lo darajada ishladi va biz doimiy ravishda xavf tug‘dirdik. Bu taraqqiy etayotganimizning yana bir isbotidir. Bunday futbolni ko‘paytirish kerak.

Ochko yo‘qotish og‘riqli, chunki biz ilgari ham shunday vaziyatga tushganmiz. Biz faqat saboq olishimiz va yaxshiroq bo‘lishga harakat qilishimiz mumkin," - dedi Xau BBC Match of the Day nashriga.