Osiyo Chempionlar ligasi 2 musobaqasining guruh bosqichi so‘nggi turida «Andijon» jamoamiz Qatar poytaxti Doha shahrida «Al-Ahli»ga qarshi maydonga tushishidan xabardorsiz.
Ushbu muhim uchrashuvni o‘zida o‘tkazadigan muhtasham «As-Sumama» stadioni haqida muxlislarimiz eshitishgan. Boisi, ushbu arena 2022 yili Qatarda o‘tkazilgan jahon chempionati o‘yinlariga mezbonlik qilgan.
«As-Sumama» stadioni 2021 yilning 21 oktyabr kuni foydalanishga topshirilgan. O‘z bag‘riga 44 400 muxlisni sig‘diradi.
«JCH–2022»da ushbu arenda guruh bosqichi doirasida Senegal — Niderlandiya (0:2), Ispaniya — Kosta-Rika (7:0), Qatar — Senegal (1:3), Belgiya — Marokash (0:2), Eron — AQSH (0:1), Kanada — Marokash (1:2), 1/8 finalda Fransiya — Polsha (3:1) va 1/4 finalda Marokash — Portugaliya (1:0) uchrashuvlari bo‘lib o‘tgan.
«Al-Ahli» klubi guruh bosqichidagi o‘z maydonida o‘tgan dastlabki ikkita o‘yin — «Al-Xolidiya» va «Arkadag‘» jamoalarini ham «As-Sumama»da qabul qilgan.
Muhtasham arena ilk bor «Andijon»ning o‘yiniga mezbonlik qiladi!













