Madridning «Real» klubi bosh murabbiyi Xabi Alonso tarkibni kelajakka mo‘ljallab kuchaytirish uchun ustuvor deb hisoblayotgan uch nafar futbolchini aniqladi, deb xabar berdi El Confidencial.

"Madrid" qishki transfer bozorida faol ish olib bormoqchi emas. Klub rahbariyati avvalroq yanvar oyida tarkibni kuchaytirmaslikka qaror qilgan, chunki mavjud futbolchilar qo‘yilgan vazifalarni bajarishga qodir, deb hisoblanmoqda. Shu bilan birga, jamoa bosh murabbiyi Xabi Alonsoda o‘rta muddatli istiqbolda kuchaytirish talab etiladigan pozisiyalar bo‘yicha aniq tasavvur mavjud.

OAV ma’lumotlariga ko‘ra, mutaxassisning ro‘yxatida uch nafar futbolchi bor. Ulardan biri — «Liverpul»ning markaziy himoyachisi Ibraima Konate bo‘lib, uning shartnomasi yozda yakuniga yetadi. Klubda futbolchining yoshi, jismoniy ko‘rsatkichlari va yuqori darajadagi tajribasi inobatga olinmoqda.

Shuningdek, murabbiylar shtabi diqqat markazida «Shtutgart» yarim himoyachisi Angelo Shtiller ham bor. Biroq nemis xavbekining ehtimoliy transferi «Real» yarim himoyasidagi ehtimoliy o‘zgarishlar bilan bevosita bog‘liq. Hozircha bu variant ustuvor hisoblanmaydi va yaqin maqsad sifatida qaralmayapti.

Xabi Alonso yuqori baholaydigan uchinchi futbolchi — hujumkor yarim himoyachi Florian Virs. Murabbiy uni Germaniyada birga ishlagan davrlaridan yaxshi taniydi. Madrid klubida futbolchining salohiyati yuqori baholanmoqda va uning karyerasidagi hozirgi holatga qaramasdan, kelajakda qiziqish bildirilishi mumkinligi istisno qilinmayapti. Ayni paytda Virs «Liverpul» klubida to‘p surmoqda.