"Chelsi" 1 yanvar kuni Enso Mareskaning iste’fosini e’lon qilib, ko‘pchilikni hayratda qoldirdi.
Italiyalik murabbiy qo‘l ostidagi so‘nggi o‘yinda "ko‘klar" "Bornmut" bilan durang qayd etgandi (2:2). Mareska o‘zini yomon his qilayotganini aytib, o‘yindan keyingi matbuot anjumanida qatnashishdan bosh tortdi, ammo ma’lum bo‘lishicha, o‘sha paytda murabbiy klubdagi faoliyatini davom ettirmasligini bilgan. The Athletic xabariga ko‘ra, mutaxassis kiyinish xonasida futbolchilar bilan xayrlashmagan ham: u kiyimlarini almashtirib, narsalarini yig‘ishtirgan va futbolchilarga murojaat qilmasdan shunchaki chiqib ketgan.
"Chelsi"ni 2024 yilning yozidan buyon Enso Mareska boshqarib kelayotgandi. Italiyalik qo‘l ostidagi jamoaning asosiy yutuqlari Konferensiyalar ligasi va klublar o‘rtasidagi jahon chempionatidagi g‘alabalar bo‘ldi.
