Ukraina terma jamoasi va Rimning "Roma" klubi markaziy hujumchisi Artyom Dovbik qishki transfer oynasida klubini o‘zgartirishga tayyorlanmoqda. Bu haqda jurnalist Nikolo Skira ijtimoiy tarmoqlarda xabar berdi.
Italiya klubi "bo‘rilar" ustozi Jan Pyero Gasperinining rejalariga kirmagan 28 yoshli hujumchi bilan xayrlashish variantlarini ko‘rib chiqishga tayyor.
Dovbikning bozor narxi 20 million yevroga baholanmoqda. Ukrainalik va rimliklar o‘rtasidagi mehnat shartnomasi 2029 yilning yozida tugaydi.
Hujumchi 2025/2026 yilgi mavsumda 16 ta o‘yinda qatnashib, 2 ta gol va 2 ta golli uzatmani o‘z hisobiga yozdirib qo‘ydi.
Ma’lumot uchun. "Roma" o‘tgan yozda Eldor Shomurodovni "Bashakshehir"ga ijaraga yuborib, Dovbikni olib qolgan edi. "Brayton"dan jamoaga kelgan Evan Fergyuson ham yaqin orada klubdan ketishi mumkin.
