Xabaringiz bor, «Andijon» klubiga taklif qilingan yangi futbolchilar orasida serbiyalik tajribali himoyachi Nemanya Chalasan ham bor.

29 yoshli legioner «Burgutlar»ning Antaliyadagi yig‘inida ishtirok etyapti va muxlislarning ham undan umidi katta. Chalasan ilk bor klub matbuot xizmatiga fikrlari bilan o‘rtoqlashdi.

— Nemanya, sizni jamoamizda ko‘rib turganimizdan mamnunmiz. Nima uchun «Andijon»ni tanladingiz?
— Rostini aytsam, meni «Andijon»ga qo‘shilishimga bosh murabbiy sabab bo‘ldi. U meni o‘z jamoasida ko‘rishni istayotganini his qildim. Shuningdek, avval ham menga qo‘ng‘iroq qilgandi. Biroq o‘sha paytda birga ishlash nasib qilmadi. Men uni murabbiy sifatida ham juda hurmat qilaman. Chunki u o‘zbek futbolini rivoji uchun katta ish qilgan. Ikkinchi sabab — bu muxlislar. Men ularning eng sadoqatli ekanini ko‘rdim.

— Jamoada sizdan nima kutishyapti, deb o‘ylaysiz?
— Mendan to‘liq kuch bilan harakat qilishimni va jamoaga yordam berishimni kutishyapti.

— «Andijon» — bu siz uchun bir so‘z bilan nimani anglatadi?
— Katta klub.

— Sizni futbolchi sifatida kim ilhomlantiradi?
— Nemanya Vidich.

— «Andijon»dagi faoliyatingiz tarixga muhrlanishi uchun uni qanday yozmoqchisiz?
— Har doim eng yuqori maqsadlar qo‘yiladi. Yakunda biz xursand bo‘lamiz.

— O‘zbekiston chempionatida ilk bor ishtirok etyapsiz. Lekin siz chempionatimiz haqida eshitgansiz. Bu borada nima deya olasiz?
— O‘ylaymanki, O‘zbekistonda futbol yaxshi rivojlanyapti. Bu borada mamlakat ham yanada taraqqiy etib boryapti.