Хабарингиз бор, «Андижон» клубига таклиф қилинган янги футболчилар орасида сербиялик тажрибали ҳимоячи Неманья Чаласан ҳам бор.

29 ёшли легионер «Бургутлар»нинг Анталиядаги йиғинида иштирок этяпти ва мухлисларнинг ҳам ундан умиди катта. Чаласан илк бор клуб матбуот хизматига фикрлари билан ўртоқлашди.

— Неманья, сизни жамоамизда кўриб турганимиздан мамнунмиз. Нима учун «Андижон»ни танладингиз?
— Ростини айтсам, мени «Андижон»га қўшилишимга бош мураббий сабаб бўлди. У мени ўз жамоасида кўришни истаётганини ҳис қилдим. Шунингдек, аввал ҳам менга қўнғироқ қилганди. Бироқ ўша пайтда бирга ишлаш насиб қилмади. Мен уни мураббий сифатида ҳам жуда ҳурмат қиламан. Чунки у ўзбек футболини ривожи учун катта иш қилган. Иккинчи сабаб — бу мухлислар. Мен уларнинг энг садоқатли эканини кўрдим.

— Жамоада сиздан нима кутишяпти, деб ўйлайсиз?
— Мендан тўлиқ куч билан ҳаракат қилишимни ва жамоага ёрдам беришимни кутишяпти.

— «Андижон» — бу сиз учун бир сўз билан нимани англатади?
— Катта клуб.

— Сизни футболчи сифатида ким илҳомлантиради?
— Неманья Видич.

— «Андижон»даги фаолиятингиз тарихга муҳрланиши учун уни қандай ёзмоқчисиз?
— Ҳар доим энг юқори мақсадлар қўйилади. Якунда биз хурсанд бўламиз.

— Ўзбекистон чемпионатида илк бор иштирок этяпсиз. Лекин сиз чемпионатимиз ҳақида эшитгансиз. Бу борада нима дея оласиз?
— Ўйлайманки, Ўзбекистонда футбол яхши ривожланяпти. Бу борада мамлакат ҳам янада тараққий этиб боряпти.