«Manchester Siti» jamoasi yarimhimoyachi Rodrini tarkibida saqlab qolishni rejalashtirmoqda. TEAMtalk xabariga ko‘ra, «shaharliklar» yaqin oylarda ispaniyalik futbolchi bilan shartnomani uzaytirish bo‘yicha muzokaralarni qayta boshlash niyatida. Har ikki tomon ham yangi kelishuv tuzishga ochiq.

Yangi shartnomaning rasmiy imzolanishi joriy yil yozida bo‘lishi kutilmoqda. Rodri 2019 yilda madridning «Atletiko» klubidan «Manchester Siti»ga 70 million yevro evaziga o‘tgan edi. Uning amaldagi shartnomasi 2027 yil 30 iyuniga qadar amal qiladi.

Joriy mavsumda yarimhimoyachi barcha musobaqalar doirasida «shaharliklar» safida 12 ta o‘yin o‘tkazib, 1 ta gol urdi. Transfermarkt portali ispaniyalik futbolchining bozor qiymatini 75 million yevro deb baholamoqda.