Saudiya Arabistoni mezbonlik qilayotgan 2026 yilgi U-23 Osiyo Kubogining “A” guruhi uchrashuvlari yakunlandi. Guruh bosqichi natijalariga ko‘ra, Vyetnam va Iordaniya U-23 terma jamoalari chorak final yo‘llanmasini qo‘lga kiritdi.

Iordaniya Qirg‘iz Respublikasiga qarshi bahsda 1:0 hisobida g‘alaba qozondi. Uchrashuvdagi yagona gol 33-daqiqada Ali Al-Aziziy tomonidan kiritildi. Shu tariqa iordaniyaliklar ochkolari sonini 6 taga yetkazib, 2-o‘rin bilan pley-off bosqichiga yo‘l oldi. Bu bosqichda Iordaniyaga «B» guruhi g‘olibi Yaponiya U-23 terma jamoasi raqiblik qiladi.

Guruhdagi ikkinchi uchrashuvda musobaqa mezboni Saudiya Arabistoni Vyetnamga qarshi bahs olib bordi. Uchrashuv 1:0 hisobida vyetnamliklarning g‘alabasi bilan yakunlandi. 64-daqiqada Nguyen Din Bak gol urib, jamoasiga g‘alaba va 3 ochko taqdim etdi. Shu tariqa “A” guruhi peshqadami sifatida chorak finalga yo‘llanmani qo‘lga kiritgan Vyetnam «B» guruhida 2-o‘rinni egallagan jamoaga qarshi bahs olib boradi.

Saudiya Arabistoni va barcha o‘yinda mag‘lub bo‘lgan Qirg‘iz Respublikasi U-23 terma jamoalari musobaqa bilan xayrlashdi.

Ma’lumot uchun, O‘zbekiston 3-tur uchrashuvini bugun, 13 yanvar kuni Janubiy Koreyaga qarshi o‘tkazadi. O‘yin “Shahzoda Faysal bin Fahd” stadionida Toshkent vaqti bilan soat 16:30 da boshlanadi. Mazkur bahsdagi g‘alaba yoki durang natija evaziga O‘zbekiston U-23 terma jamoasi chorak final yo‘llanmasini qo‘lga kiritadi. Jamoa mag‘lub bo‘lganda esa Livan U-23 terma jamoasi Eron ustidan g‘alaba qozonishi yoki uchrashuvni durang bilan yakunlashi talab etiladi.

Musobaqada 16 jamoa 4 ta guruhga bo‘lingan bo‘lib, har bir guruhda dastlabki ikki o‘rinni egallagan jamoalar chorak finalga yo‘l oladi. Musobaqada 2003 yil 1 yanvardan keyin tug‘ilgan futbolchilar ishtirok etish huquqiga ega. Ushbu turnirda O‘zbekiston U-21 terma jamoasi qatnashmoqda.