Саудия Арабистони мезбонлик қилаётган 2026 йилги U-23 Осиё Кубогининг “А” гуруҳи учрашувлари якунланди. Гуруҳ босқичи натижаларига кўра, Вьетнам ва Иордания U-23 терма жамоалари чорак финал йўлланмасини қўлга киритди.

Иордания Қирғиз Республикасига қарши баҳсда 1:0 ҳисобида ғалаба қозонди. Учрашувдаги ягона гол 33-дақиқада Али Ал-Азизий томонидан киритилди. Шу тариқа иорданияликлар очколари сонини 6 тага етказиб, 2-ўрин билан плей-офф босқичига йўл олди. Бу босқичда Иорданияга «B» гуруҳи ғолиби Япония U-23 терма жамоаси рақиблик қилади.

Гуруҳдаги иккинчи учрашувда мусобақа мезбони Саудия Арабистони Вьетнамга қарши баҳс олиб борди. Учрашув 1:0 ҳисобида вьетнамликларнинг ғалабаси билан якунланди. 64-дақиқада Нгуен Дин Бак гол уриб, жамоасига ғалаба ва 3 очко тақдим этди. Шу тариқа “А” гуруҳи пешқадами сифатида чорак финалга йўлланмани қўлга киритган Вьетнам «B» гуруҳида 2-ўринни эгаллаган жамоага қарши баҳс олиб боради.

Саудия Арабистони ва барча ўйинда мағлуб бўлган Қирғиз Республикаси U-23 терма жамоалари мусобақа билан хайрлашди.

Маълумот учун, Ўзбекистон 3-тур учрашувини бугун, 13 январь куни Жанубий Кореяга қарши ўтказади. Ўйин “Шаҳзода Файсал бин Фаҳд” стадионида Тошкент вақти билан соат 16:30 да бошланади. Мазкур баҳсдаги ғалаба ёки дуранг натижа эвазига Ўзбекистон U-23 терма жамоаси чорак финал йўлланмасини қўлга киритади. Жамоа мағлуб бўлганда эса Ливан U-23 терма жамоаси Эрон устидан ғалаба қозониши ёки учрашувни дуранг билан якунлаши талаб этилади.

Мусобақада 16 жамоа 4 та гуруҳга бўлинган бўлиб, ҳар бир гуруҳда дастлабки икки ўринни эгаллаган жамоалар чорак финалга йўл олади. Мусобақада 2003 йил 1 январдан кейин туғилган футболчилар иштирок этиш ҳуқуқига эга. Ушбу турнирда Ўзбекистон U-21 терма жамоаси қатнашмоқда.