"Manchester Siti" bosh murabbiyi Pep Gvardiola Abduqodir Husanovning rivojlanishi haqida o‘z fikrlarini bildirdi.
«U tezkor o‘yinchi edi, hozir ham tezkor o‘yinchi — hech narsa o‘zgarmadi. U juda ishonchli. Fransiyada olti oy yuqori darajada o‘ynab, bu yerga keldi — oson emas.
Uni «special» (maxsus) futbolchi deb hisoblayman. O‘yin uslubimiz uchun haqiqatan ham o‘ziga xos futbolchi, bizga ko‘p yordam beradi, chunki jamoa juda yuqoriga ko‘tarilib o‘ynaymiz. Orqa chiziqdagi barcha pozisiyalarni u juda yaxshi yopmoqda. Menimcha, uning o‘zi ham bunday harakatlarni bajarishni yaxshi ko‘radi.
Asta-sekin nima qilish kerakligini tushunib bormoqda; to‘p bilan ishlash jarayonida u bizga kerak, u buni uddalaydi. U juda yosh. U murabbiy tarbiyalashi uchun qulay futbolchi. Mashg‘ulotlarda har doim yaxshi ishlaydi. 100 foiz borini beradi.
Top transfer. O‘tgan mavsumda klub uni o‘z safiga qo‘shib olish bo‘yicha ajoyib qaror qabul qilganini aytganman. Husanov shunaqa futbolchiki, uni transfer bozoriga qo‘ysangiz, dunyoning TOP-10 jamoalari uni xohlashadi, chunki unda noyob fazilat bor. Himoyachida topish juda qiyin bo‘lgan maxsus xususiyatlarga ega».
Ingliz tilida yetarlicha gaplashishni o‘rganib olgan. Hamma ko‘rsatmalarni tez ilg‘ab oladi. Yanada o‘sishi mumkin, buning uchun esa «Men o‘ylaganimdan ham yaxshiroqman» deb o‘zi ishonishi kerak. Men uni zo‘rligini, juda iste’dodli ekanligini aytib doimo ruhlantirib turaman.
Uning uzun to‘plar, uzoq masofaga uzatmalar qilish qobiliyati bor, u himoya chizig‘ini ajoyib tarzda yorib o‘tadi, paslarni tez va aniq uzatadi. Faqat bularni doimiy bajarishga ko‘proq jasorat kerak. Bu vaqt bilan keladigan narsa. U hali juda yosh. Qancha ko‘p o‘ynasa, shuncha tajriba orttiradi», - dedi ispaniyalik mutaxassis.
