UFC yarimo‘rta vazn toifasining amaldagi chempioni, 34 yoshli rossiyalik Islom Maxachev navbatdagi jangini ushbu vazn toifasida mag‘lubiyatsiz seriya qayd etayotgan va reytingda ikkinchi o‘rinni egallab turgan qozog‘istonlik Shavkat Rahmonovga qarshi o‘tkazish ehtimolini inkor etmadi.
“Shavkat? Unda uzoq tanaffus bo‘ldi. Bu masalani men hal qilmayman. Agar u tayyor bo‘lsa, nega endi yo‘q? Eshitishimcha, tanaffusdan keyin unga jang berilishi kerak”, deya Maxachevning so‘zlarini keltiradi Match TV.
Ayni paytda Islom Maxachev UFC'da ketma-ket 16 ta g‘alaba qayd etgan. Umuman olganda, uning hisobida 28 ta g‘alaba va 1 ta mag‘lubiyat bor. Rossiyalik jangchi so‘nggi jangini Nyu Yorkda bo‘lib o‘tgan UFC 322 turnirida avstraliyalik Jek Della Maddalenaga qarshi o‘tkazdi. Yarimo‘rta vazn chempionlik kamari uchun kechgan bahsda hakamlarning bir ovozdan chiqargan qarori bilan Maxachev g‘alaba qozongan.
Ma’lumot uchun, Shavkat Rahmonov professional faoliyati davomida 19 ta jang o‘tkazgan va ularning barchasida g‘alaba qozongan. U 2020-yildan buyon UFC doirasida 7 marta oktagonga chiqib, barcha janglarda raqiblarini mag‘lub etgan. Sportchi oxirgi jangini 2024-yilning 7-dekabr sanasida Ian Machado Garriga qarshi o‘tkazib, g‘alaba qozongan edi.
