Londonning "Arsenal" klubi hujumchisi Gabriel Jezus klubni tark etishi mumkinligi haqidagi turli mish-mishlarga qaramay, klubda qolish istagini bildirdi. Bu haqda insayder Ekrem Konur xabar bermoqda.

Manbaga ko‘ra, 28 yoshli braziliyalik futbolchi "Arsenal" bilan 2027 yilning yozida tugaydigan mehnat shartnomasini uzaytirmoqchi.

Jezus "kanonirlar" safida 2022 yildan buyon to‘p surib kelmoqda. U joriy mavsumda barcha musobaqalarda 12 ta o‘yinda maydonga tushib, 3 ta gol urdi va 1 ta golli uzatmani amalga oshirdi.

Transfermarkt ma’lumotlariga ko‘ra, Jezusning narxi 20 million yevroga teng.