Londonning "Chelsi" klubi argentinalik yarim himoyachisi Enso Fernandes joriy mavsum yakunlangach jamoani tark etishi mumkin. Bu haqda jurnalist Ekrem Konur ma’lum qildi.

Manbaga ko‘ra, "PSJ" kelasi yozda "Chelsi"ga katta taklif bilan chiqishga tayyorlanmoqda. Shu bilan birga, "Real" Fernandesni kuzatishni to‘xtatgani qayd etilgan. Ta’kidlanishicha, "ko‘klar" o‘z yarim himoyachisini 100-140 million yevroga qo‘yib yuborishga tayyor.

Eslatib o‘tamiz, 2023 yilda "Chelsi" Fernandesni "Benfika"dan 121 million yevroga sotib olgan edi. Joriy mavsumda 25 yoshli xavbek barcha musobaqalarda 32 ta o‘yinda maydonga tushib, 8 ta gol urdi va 4 ta golli uzatmaga mualliflik qildi.