TalkSPORT nashri jurnalisti Aleks Kruk "Chelsi" Madridning "Atletiko" klubi hujumchisi Xulian Alvares bilan shartnoma imzolashga qiziqish bildirayotgani haqidagi mish-mishlarga izoh berdi.
"Bu yanvarda tuziladigan bitim emas, ammo "Chelsi" Alvares yozda o‘tishi mumkin bo‘lgan klub sifatida tilga olingan. O‘ylaymanki, bu qimmat transfer bo‘ladi. "Atletiko" futbolchi uchun 100 million yevro so‘ragani haqida mish-mishlar yuribdi. Bu "Chelsi" uslubiga to‘g‘ri kelmaydi, chunki Xulian 25 yoshda, yaqinda u 26 yoshga to‘ladi.
"Chelsi" Palinyani "Fulxem"da o‘ynab yurgan paytida sotib olishdan bosh tortganini bilaman, chunki 26 yoshida uni keksa deb hisoblashgan. Ular yaxshigina pulga sotib olib, keyin qimmatroqqa sotish mumkin bo‘lgan futbolchilarni afzal ko‘rishadi, ammo u "Chelsi"ni o‘zgartirishi aniq, chunki ularda haqiqatan ham sifatli o‘yinchilar bor, ammo hujumda kuch yetishmaydi.
"Chelsi" tavakkal qilib, Liam Delapni sotib oldi, ammo hozircha bu o‘zini oqlamadi, asosan uning jarohatlari va diskvalifikasiyalari tufayli. Joao Pedro "to‘qqizlik"dan ko‘ra ko‘proq "o‘nlik"dir. Shu sababli, agar "Chelsi" APLda mavsum davomida 20 tadan gol uradigan futbolchini qo‘lga kirita olganida, klub haqiqiy tahdidga aylangan bo‘lardi", - deya Krukning so‘zlarini keltiradi talkSPORT.
Xulian Alvares 2024 yilning yozida "Manchester Siti"dan 75 million yevro evaziga "Atletiko"ga o‘tgandi. Uning "matraschilar" bilan shartnomasi 2030 yilning 30 iyuniga qadar imzolangan.
Joriy mavsumda hujumchi Madrid klubi safida barcha musobaqalarda 27 ta o‘yinda maydonga tushib, 11 ta gol urdi va beshta golli uzatmani amalga oshirdi.
