TalkSPORT нашри журналисти Алекс Крук "Челси" Мадриднинг "Атлетико" клуби ҳужумчиси Хулиан Альварес билан шартнома имзолашга қизиқиш билдираётгани ҳақидаги миш-мишларга изоҳ берди.
"Бу январда тузиладиган битим эмас, аммо "Челси" Альварес ёзда ўтиши мумкин бўлган клуб сифатида тилга олинган. Ўйлайманки, бу қиммат трансфер бўлади. "Атлетико" футболчи учун 100 миллион евро сўрагани ҳақида миш-мишлар юрибди. Бу "Челси" услубига тўғри келмайди, чунки Хулиан 25 ёшда, яқинда у 26 ёшга тўлади.
"Челси" Палиньяни "Фулхэм"да ўйнаб юрган пайтида сотиб олишдан бош тортганини биламан, чунки 26 ёшида уни кекса деб ҳисоблашган. Улар яхшигина пулга сотиб олиб, кейин қимматроққа сотиш мумкин бўлган футболчиларни афзал кўришади, аммо у "Челси"ни ўзгартириши аниқ, чунки уларда ҳақиқатан ҳам сифатли ўйинчилар бор, аммо ҳужумда куч етишмайди.
"Челси" таваккал қилиб, Лиам Делапни сотиб олди, аммо ҳозирча бу ўзини оқламади, асосан унинг жароҳатлари ва дисквалификациялари туфайли. Жоао Педро "тўққизлик"дан кўра кўпроқ "ўнлик"дир. Шу сабабли, агар "Челси" АПЛда мавсум давомида 20 тадан гол урадиган футболчини қўлга кирита олганида, клуб ҳақиқий таҳдидга айланган бўларди", - дея Крукнинг сўзларини келтиради talkSPORT.
Хулиан Альварес 2024 йилнинг ёзида "Манчестер Сити"дан 75 миллион евро эвазига "Атлетико"га ўтганди. Унинг "матрасчилар" билан шартномаси 2030 йилнинг 30 июнига қадар имзоланган.
Жорий мавсумда ҳужумчи Мадрид клуби сафида барча мусобақаларда 27 та ўйинда майдонга тушиб, 11 та гол урди ва бешта голли узатмани амалга оширди.
