UFC prezidenti Dana Uayt jamoatchilikning 14 iyun kuni AQSH prezidentining rasmiy qarorgohi hududida - Oq uyda o‘tkazilishi rejalashtirilgan UFC turnirini siyosiylashtirish haqidagi ayblovlariga qisqacha javob berdi.
"Jorj Bush beysbol, Obama NBA, Tramp esa UFC muxlisi edi. O‘ylaymanki, bu bilan hech bir sport o‘ta siyosiylashib ketmagan", - deya Uaytning so‘zlarini keltiradi X ijtimoiy tarmog‘idagi Championship Rounds akkaunti.
Qizig‘i shundaki, turnir AQSH prezidenti Donald Trampning tug‘ilgan kunida bo‘lib o‘tadi. U 80 yoshga to‘ladi. Biroq, rasmiy ravishda tadbir mustaqillik deklarasiyasi qabul qilinganining 250 yilligiga bag‘ishlanadi.
