«Manchester Yunayted» va 33 yoshli yarimhimoyachi Kazemiro o‘rtasida hamkorlikni to‘xtatish qarori o‘zaro kelishuv asosida qabul qilingan. Bu haqda ESPN xabar bermoqda.

Manba ma’lumotlariga ko‘ra, rahbariyatning yangi falsafasiga muvofiq, klub jamoada Kazemiro misolidagi kabi yoshi katta va yuqori maosh oluvchi futbolchilar bo‘lishini istamaydi. Yarimhimoyachining o‘zi ham «qizil iblislar» safidagi davri o‘z yakuniga yetganini anglagan.

Payshanba kuni, 22 yanvarda, «Manchester Yunayted» mavsum yakunida yarimhimoyachining jamoani tark etishini rasman e’lon qildi.

Futbolchi 2022 yilda Madridning «Real» klubidan «Manchester Yunayted»ga o‘tgan edi. Shu davr mobaynida 33 yoshli yarimhimoyachi barcha musobaqalarda 146 ta o‘yinda ishtirok etib, 21 ta gol va 13 ta golli uzatma muallifi bo‘ldi. Transfermarkt portali ma’lumotlariga ko‘ra, Kazemironing bozor qiymati 8 million yevroni tashkil etadi.