«Манчестер Юнайтед» ва 33 ёшли яримҳимоячи Каземиро ўртасида ҳамкорликни тўхтатиш қарори ўзаро келишув асосида қабул қилинган. Бу ҳақда ESPN хабар бермоқда.
Манба маълумотларига кўра, раҳбариятнинг янги фалсафасига мувофиқ, клуб жамоада Каземиро мисолидаги каби ёши катта ва юқори маош олувчи футболчилар бўлишини истамайди. Яримҳимоячининг ўзи ҳам «қизил иблислар» сафидаги даври ўз якунига етганини англаган.
Пайшанба куни, 22 январда, «Манчестер Юнайтед» мавсум якунида яримҳимоячининг жамоани тарк этишини расман эълон қилди.
Футболчи 2022 йилда Мадриднинг «Реал» клубидан «Манчестер Юнайтед»га ўтган эди. Шу давр мобайнида 33 ёшли яримҳимоячи барча мусобақаларда 146 та ўйинда иштирок этиб, 21 та гол ва 13 та голли узатма муаллифи бўлди. Transfermarkt портали маълумотларига кўра, Каземиронинг бозор қиймати 8 миллион еврони ташкил этади.













