Ertaga Indoneziya poytaxti Jakarta shahrida futzal bo‘yicha Osiyo kubogi – 2026 musobaqasiga start beriladi. Ushbu turnir qit’a futzali tarixidagi 18-final bosqich bahslari hisoblanadi. Shu bilan birga, Indoneziya ikkinchi bor Osiyo qit’a chempionatiga mezbonlik qilmoqda.

Futzal bo‘yicha Osiyo kubogi musobaqasiga ilk bor 1999 yilda asos solingan. X qit’a chempionatigacha musobaqa har yili o‘tkazib kelingan bo‘lsa, 2008 yildan e’tiboran Osiyo futbol konfederasiyasi (OFK) qaroriga ko‘ra turnir ikki yilda bir marta tashkil etiladigan bo‘ldi. Ulardan har ikkinchisi Jahon chempionati uchun saralash vazifasini ham o‘tab berishi bilan alohida ahamiyat kasb etadi.

Bugunga qadar Osiyo kubogi final bosqichi 11 ta mamlakatda jami 17 marta o‘tkazilgan. Mezbonlik bo‘yicha eng yuqori ko‘rsatkich O‘zbekistonga tegishli: mamlakatimiz qit’a futzali forumini Toshkent shahrida uch marta — 2006, 2010 va 2016 yillarda qabul qilgan.

Osiyo kubogi tarixida to‘rtta terma jamoa barcha musobaqalarda uzluksiz ishtirok etib kelmoqda. Bular — Eron, Yaponiya, O‘zbekiston va Tailand terma jamoalaridir. Aynan shu jamoalar eng sovrindor termalar sifatida ham e’tirof etilgan:

- Eron — 13 ta oltin, 2 ta kumush, 2 ta bronza

- Yaponiya — 4 ta oltin, 6 ta kumush, 2 ta bronza

- O‘zbekiston — 4 ta kumush, 6 ta bronza

- Tailand — 3 ta kumush, 5 ta bronza

Shaxsiy sovrinlar borasida ham eronlik futzalchilar yetakchilik qilib kelmoqda. Vohid Shamsai va Ali Asqar Hasanzoda uch martadan Osiyo kubogi final bosqichining “eng yaxshi o‘yinchisi” deb topilgan.

To‘purarlar poygasida ham rekord Eron terma jamoasi hujumchisi Vohid Shamsaiga tegishli. U sakkiz marta Osiyo kubogi final bosqichlarining eng sermahsul o‘yinchisi bo‘lgan.

“Halol o‘yin” (Fair Play) nominasiyasida ham Eron terma jamoasi peshqadam: eronliklar ushbu sovrinni olti marta qo‘lga kiritishgan. O‘zbekiston, Yaponiya va Tailand terma jamoalari esa ikki martadan mazkur mukofot sohibiga aylangan.

Osiyo kubogi final bosqichlarida eng ko‘p ishtirok etgan o‘yinchi sifatida O‘zbekiston terma jamoasi posboni Rustam Umarov alohida qayd etiladi. U 13 marta qit’a chempionatlari final bosqichida maydonga tushgan.