Yarimhimoyachi Allan Sen-Maksimen farzandlari irqchilik qurboni bo‘lgani uchun "Amerika"ni tark etdi, deb yozadi L’Equipe.

Fransuz Meksika klubiga 2025 yilning yozida kelib qo‘shilgan. Ishdan ketishi haqida rasman e’lon qilishdan oldin u Instagramda post joylab, farzandlari Meksikada duch kelgan irqchilikni qoralagan.

"Muammo terining rangida emas, fikrlashning rangida. Menga hujum qilish muammo emas. Men ulg‘aydim, yashirin, sezilmagan yoki oshkora hujumlarga qarshi turishni o‘rgandim. Lekin men hech qachon toqat qilolmaydigan bir narsa bor: u ham bo‘lsa, bolalarimga hujum qilish.

Farzandlarimni himoya qilish mening ustuvor vazifam bo‘lib, ularning kelib chiqishi va terisining rangidan qat’i nazar, hurmat va muhabbatni ta’minlash uchun bor kuchim bilan kurashaman. Bizning jamiyatimizda nafrat va kamsitishga o‘rin yo‘q", dedi futbolchi.