Яримҳимоячи Аллан Сен-Максимен фарзандлари ирқчилик қурбони бўлгани учун "Америка"ни тарк этди, деб ёзади L’Equipe.
Француз Мексика клубига 2025 йилнинг ёзида келиб қўшилган. Ишдан кетиши ҳақида расман эълон қилишдан олдин у Инстаграмда пост жойлаб, фарзандлари Мексикада дуч келган ирқчиликни қоралаган.
"Муаммо терининг рангида эмас, фикрлашнинг рангида. Менга ҳужум қилиш муаммо эмас. Мен улғайдим, яширин, сезилмаган ёки ошкора ҳужумларга қарши туришни ўргандим. Лекин мен ҳеч қачон тоқат қилолмайдиган бир нарса бор: у ҳам бўлса, болаларимга ҳужум қилиш.
Фарзандларимни ҳимоя қилиш менинг устувор вазифам бўлиб, уларнинг келиб чиқиши ва терисининг рангидан қатъи назар, ҳурмат ва муҳаббатни таъминлаш учун бор кучим билан курашаман. Бизнинг жамиятимизда нафрат ва камситишга ўрин йўқ", деди футболчи.
