Niderlandiyaning Veyk-an-Zee shahrida bo‘lib o‘tgan shaxmat bo‘yicha nufuzli “Tata Steel Chess 2026” xalqaro turnirda muvaffaqiyatli ishtirok etgan Nodirbek Abdusattorov va Javohir Sindorov O‘zbekistonga qaytib keldi.
Sportchilar Toshkent xalqaro aeroportida Sport vazirligi, Yoshlar ishlari agentligi, O‘zbekiston shaxmat federasiyasi mutasaddilari, ommaviy axborot vositalari vakillari va ota-onalari ishtirokida kutib olindi.
O‘zbekistonning birinchi raqamli shaxmatchisi Nodirbek Abdusattorov musobaqaning Masters guruhi doirasidagi 13-tur uchrashuvida hindistonlik Arjun Erigaisi ustidan g‘alaba qozondi. Ushbu natijadan so‘ng Abdusattorov ochkolari sonini 9 taga yetkazib, turnir jadvalida yakka peshqadam sifatida birinchi o‘rinni egalladi va chempionlikni qo‘lga kiritdi.
U turnir davomida hindistonlik Rameshbabu Praggnanandha, chexiyalik Nguyen Tai Dai Van, amaldagi Jahon chempioni Gukesh Dommaraju, germaniyalik Vinsent Keymer va Mattias Bluyebaum singari kuchli grossmeysterlarni mag‘lub etdi.
Shuningdek, musobaqada 13 imkoniyatdan 8,5 ochko jamg‘argan Javohir Sindorov esa 2-o‘rin bilan taqdirlandi. U turnir davomida 4 g‘alaba va 9 ta durang natija qayd etdi.
