«An-Nasr» hujumchisi Krishtianu Ronaldu bugungi jamoa mashg‘ulotida ishtirok etmadi.
Kecha portugaliyalik futbolchi Saudiya Arabistoni chempionatidagi «Ar-Riyod»ga qarshi o‘yinni ham o‘tkazib yuborgan edi. Xabarlarga ko‘ra, bu Ronalduning Saudiya Arabistoni Davlat investisiya jamg‘armasi (PIF) klubni boshqarishidan noroziligi bilan bog‘liq. Uning fikricha, jamg‘arma «An-Nasr»ni raqiblar, xususan «Al-Hilol» bilan solishtirganda kamroq qo‘llab-quvvatlayapti va bu chempionlik uchun kurashga xalal bermoqda. Shuningdek, Ronaldu Karim Benzemaning «Al-Ittihod»dan «Al-Hilol»ga o‘tishini ham raqobatga zarar deb hisoblagan.
Jurnalist Abdulaziz Al-Oseymi ma’lum qilishicha, bugun Ronaldu kechagi o‘yinda qatnashmagan futbolchilar uchun o‘tkazilgan mashg‘ulotda ham bo‘lmagan.
Avvalroq, Ronaldu yozda «An-Nasr»ni tark etib, Yevropaga qaytishi yoki MLS klublaridan biriga o‘tishi mumkinligi haqida ham xabarlar tarqalgan edi.
