«Ан-Наср» ҳужумчиси Криштиану Роналду бугунги жамоа машғулотида иштирок этмади.

Кеча португалиялик футболчи Саудия Арабистони чемпионатидаги «Ар-Риёд»га қарши ўйинни ҳам ўтказиб юборган эди. Хабарларга кўра, бу Роналдунинг Саудия Арабистони Давлат инвестиция жамғармаси (PIF) клубни бошқаришидан норозилиги билан боғлиқ. Унинг фикрича, жамғарма «Ан-Наср»ни рақиблар, хусусан «Ал-Ҳилол» билан солиштирганда камроқ қўллаб-қувватлаяпти ва бу чемпионлик учун курашга халал бермоқда. Шунингдек, Роналду Карим Бенземанинг «Ал-Иттиҳод»дан «Ал-Ҳилол»га ўтишини ҳам рақобатга зарар деб ҳисоблаган.

Журналист Абдулазиз Ал-Осейми маълум қилишича, бугун Роналду кечаги ўйинда қатнашмаган футболчилар учун ўтказилган машғулотда ҳам бўлмаган.

Аввалроқ, Роналду ёзда «Ан-Наср»ни тарк этиб, Европага қайтиши ёки МЛС клубларидан бирига ўтиши мумкинлиги ҳақида ҳам хабарлар тарқалган эди.