"Barselona"ning 18 yoshli futbolchisi Lamin Yamal hayratlanarli samaradorlik namoyish etmoqda. Seshanba kuni vinger Ispaniya Kubogi chorak finali doirasidagi "Albasete"ga qarshi o‘yinda (2:1) gol urdi — u ilk bor "ko‘k-anorranglilar" safida ketma-ket to‘rtta uchrashuvda raqib darvozasini ishg‘ol qilishga muvaffaq bo‘ldi.
Yosh yulduz kataloniyaliklar safida barcha musobaqalardagi so‘nggi 37 ta o‘yinda 33 ta samarali harakatni (18 ta gol va 15 ta assist) o‘z hisobiga yozib qo‘ydi. Shanba kuni "Barselona" Ispaniya chempionati doirasida "Malyorka"ga qarshi maydonga tushadi. Hozirda Xans-Diter Flik jamoasi La Liga turnir jadvalida 22 turdan so‘ng 55 ochko bilan peshqadamlik qilmoqda va Madridning "Real" klubini bir ochkoga ortda qoldirmoqda.
